NAWHCHIZUAR FAPA: BUNG 9-NA

NAWHCHIZUAR FAPA: BUNG 9-NA

[Ziaktu: He thawnthu hi WhatsApp group lama an rawn forward a ni a, a ziaktu a inziah lan loh avangin tu ziah nge ka hre lo. Chhiartute zingah a ziaktu hming hria chuan comment lamah rawn dah ula a lawmawm hle ang]

Prelude: Ka harh chhuah leh meuh chuan khumah hian ka lo mu a. Pitar pakhat hian, “Bawiha, i rawn harh chhuak tawh maw? I ril a ṭam em? Eng nge i duh?” tiin min min lo zawt var a. Tu nge a nih tih reng ka hre ngai hauh lo. Mak ti takin chu pitar chu ka en ha reng a. “Bawiha, nizan khan thlanmualah thichhawngin an hmu che a. Inah hian an rawn pawm chho che alawm. Tunah hian Muthiah i awm mek,” a ti a. Ka harh kawk a. Thawh tuma ka indawm kan dawn lai tak hian pa pakhat hi thisen chaw keng chung chuan a rawn lut a. “I taksa a chak lo em mai drip hi khai phawt ila, i harh kawk mai ang,” a rawn ti a. Ṭawng ngaihna vak pawh ka hre lo.

“Ka pu, ka ṭha alawm. In lamah ka...” ka tih mek laiin, “Hei tal hi kan khai zawh phawt loh chuan, kan lei laklawh tawh,” a rawn tih tak tlat avang chuan ṭan vak ngaihna awmin ka hre ta lo va...

Chawhnu tlangher a nih meuh chuan ka taksa pawh tlemin a lo chak leh deuh tawh bawk a, in lamah chuan ka haw ta a. Ka thlen veleh ka inbual a, ka inbual zawh hnu chuan room-ah laptop ka en mai mai a. Ka nu leh pa thlalak hlui te, ka nun nena kan thlalak dun tam vak lo te chu ka en nawn tluk tluk a.

Chutih lai chuan ka ngaihtuahna chu khawvel danga cheng turin her danglam a ni mek a, suangtuahna ramah chuan ka thlawk ta delh delh a.  Ka ṭhian neih chhun leh ka kianga awm reng chu ka suangtuahna chu a ni deuh tawp mai. Ka harsatna leh manganna te chu chinfel a ni dawn lo tih hre reng chungin, chu ka suangtuahna khawvelah chuan ka thlen mawlh mawlh reng a. Ani chuan ka natna leh ka manganna te chu min hriat thiampui emaw tih tur chuan a lo dawng sawng mawlh mawlh a. Boruaka thamral leh mai mai tur mah ni sela, ka rilru dik tak ka thlen ngamna awm chhun chu ka suangtuahna khawvel chu a ni tawh mai. Ka khawvel hi a va’n zim bik tak em!

Ka khabea ka mittui rawn luang thla ngiai ngiai chuan min tiharh zawk a. Khua pawh chu a lo thim fel leh der tawh mai.

‘Eng nge tih tur ka neih, eng nge hma chhawp ka neih?’ tiin ka inzawt neuh neuh a, laptop chu ka han hmet eng a, ka nuin Millenium Centre kawta thla a lak, a nuih sen senna chu a rawn lang hlawl mai a. Ka en a, ka en nawn leh ṭhin. “Ka nu,” tiin ka phun sep sep a. “Nu eng emaw tal sawi rawh,” tiin ka au lawm lawm a. Mahse, a reh hian a reh tlawk tlawk mai a ni.

Thil eng emaw ka hre chhuak zawk a. Ka nu room lamah chuan ka tlan lut nghal a, a lehkha min hnutchhiah chu ka hai kual a. Ka chhiar tawh ho bak eng mah ka hmuh belh lem lo. A tawpah chuan ka nu khum piah deuha thingrem chuan ka mit a la ta zar mai a. Ka va pan hnai a, tala te reuh te hian a lo inkalh a, chabi chu ka zawng nghal a. Ka hmuh mai tak loh avangin tuboh chuan ka chhu chhe ta ringawt a.

Ka nu leh pa inneih thlalak, A4 size frame, chu a lo let bal a, ka pa thawmhnaw tlem thleh fel thlap leh ka nu thawmhnaw ṭhenkhat, uluk taka thleh tih hriat tak mai, chu a lo inrem ṭham a. Dim tak chuan ka hai kual zel a. Thingrem mawngah chuan file pakhat polythene-a intuam chu ka zuk dap fuh ta a. Rang tak chuan ka phawrh nghal a, file chu ka hawng zung zung a. Lehkha ṭhenkhat chu LSC leh Land Revenue tih vel a ni a, a hnuai lamah chuan kutziak mawi taka ziak, phek thum lai awmna khat dal chu ka hmu fuh ta hlauh a. “Hei ngei hi a nih hi,” tiin ka phun sap a. Ka room lamah chuan ka keng chho ta a.

Ka nu lehkha min hnutchhiahah chuan hetiang hian a lo in ziak a:

“Ka fapa, he lehkha hi i hmuh hunah meuh chuan he khawvelah hian ka awm ve tawh lo maithei, i tana ka lehkha ziak ṭhenkhat chu i chhiar tawh maithei a, i la chhriar lo a nih chuan ka room almirah chhungah khan ka hnutchhiah che aw...

Bawiha, i hnenah hian sawi tur ka va han ngah tak em! Mahse, hmaichhanah erawh chuan ka sawi ngam bawk si lo. Bawiha, khawngaih takin min ngaidam hram dawn nia aw...” tiin bul chu a rawn ṭan te te a.

“Ka fapa, ‘Ka nu’ tia i koh ve ṭhin hian nu nih a tling zo lo hle a ni. Engtiang pawhin min dem mah la, thiamthu sawi tur reng reng ka nei lo! Bawiha, min ngaidam nawn mawlh mawlh ang che aw. Sawi ka va han huphurh tak em! Mahse, engkim hre ve la ka duh a ni.

Ka fapa duhtak, kum 6 liam ta khan, nang chu hostel-ah i awm daih kha, hostel fee pek a hun tawh si, pek tur ka nei bawk si lo. Thil eng emaw han hralh mai tur lah ka hre si lo va, han pûk tur leh han ban mai tur lah ka hre bawk si lo. Hostel fee lah chu thla hnih fee kan bat tawh avangin Rs 5,000 lai pek a ngai bawk si. Ka kutah Rs 800 chiah ka kawl bawk si, tih ngaihna hre lovin ka buai hle a.

Vanglaini chanchinbuah hian awmpui tur duh, lâng pawhin a theih thu an rawn chhuah hi ka hmu a, ka phone nghal a. “Rawn kal phawt la, kan sawi leh dawn nia,” an ti a. Chaw ei kham chuan inhlawhna tur lam pan chuan ka kal ta nghal a.

An in ka’n thleng chu, in ropui leh lian tak mai, chhawng sarih laia sang hi a lo ni a. Ka lut mai ngam lo va, pawn aṭang chuan ka phone ta a. Gate bulah chuan nu pakhat hian lut turin mi rawn au a. Ka va luh chuan in chhung engkim mai chu a fel fai vek bawk si a, eng ber nge ka tih ang ti rilru neuh neuh pah chuan ka hawi kual relh relh a. Hetiang taka in lian leh ropuiah hian ka la luh ngai loh avangin ka zam tak zet a ni.

Sitting room-ah chuan pa sa ṭha nelh nawlh, kum 60 mi tur vel, leh nu valai tak, kum 50 mi bawr vel tur, chu an lo ṭhu a. An bul ka va thlen chuan min lo lawm thiam hle a, min rawn hruaitu chuan min chhuahsan leh nghal a. Ka hmel an han hmuh chuan, “Ṭhiannu, pasal i nei tawh em?” tiin min zawt a. Kei chuan, “Nei tawh e; mahse, min boralsan tawh a,” ka ti a. Kan dinhmun tlangpui chu min zawh zel takah chuan ka hrilh zel a.

Eng emaw chen kan titi hnu chuan an nu zawk chu hna kal tur chuan a chhuak a, an pa ber nen chuan kan awm ta a. Chawngkaw chanchin leh eng eng emaw kan sawi hnu chuan tih tur te ka zawt a.

“Han tih vak tur pawh a awm rih lo. In nghak tur hi kan awm lo fo ṭhin a. In han chhuahsan vek aiah tiin in nghak tur i ni ber e. Chhawngkaw member angin kan awm ang a. A ṭul chuan han chet nawk nawk chang te pawh a awm tur alawm,” a ti a. “Ni e, tehreng mai, min tir bawrh bawrh rawh u,” ka ti a.

In neitupa hi Pu Zuala a ni a, contractor niin an khawsa thei hle. Chutia Pu nen chuaha kan awm takah chuan min titipui reng a. Chumi hnuah an in chhung te chu min fan kualpui a. Room nuam tak tak leh zau tak tak an ni hlawm a. Engkim mai chu a felfai vek emaw tih mai tur a ni hlawm.

Karkhat chhung lânga ka kal hnu chuan riak ve mai turin min ti a. In lam ngaihtuahawm lutuk a ni lo bawk nen, a remchan dan angin ka riak ve nghal mai ṭhin. Kar thum ka thawh hnu phei chuan kan inpawhin kan inngamtlak tawh hle a. Pi ber, Pi Chhuangi chu phai lamah trainning turin a zin dawn a. An fate chu phai lama awm sa deuh vek an ni bawk a, ei rawng bawltu a hran awm tho mah se, lo pui ṭhin turin min ti a. Rawngbawl chhung bak chu a awm ngai chuang lem lo va.

Chutia Pi ber a zin takah chuan Pu Zuala nen chauh chuan kan awm ta a. Zan rei tak tak thleng kan titi a, kan chhungkaw chanchin leh kan harsatna te min zawt a. Ani pawh chuan a harsatna leh a thil tih ṭhin te chu min hrilh ve bawk a. An nupa nun thlenga harsatna an tawh dan te chu min hrilh ta zel a.

Zankhat chu, Pu Zuala chu an nu nen rei fe an inbiak hnu chuan sitting room-ah ṭhuin kan titi leh a. Eng emaw chen kan titi luam hnu chuan, inthiam loh hmel tak hian, “Bawihi, i harsatna ka hria a, kei pawh ka harsatna ka hrilh ta che a. Pasal neih leh pawh i rilruk lem lo bawk a. Inrem siamna neih i duh em?” a rawn tichhuak ta hlawl mai a.

“Eng inremsiamna maw?” tiin ka lo zawt let hâ a! A inthiam leh chiah lo na a, t mah dang an awm loh avangin sawi tlang erawh a tum tho tih hriat tak chuan, “Tlang takin ka hrilh ang che. Mahse, thuruk tawpkhawk a nih dawn avangin i duh lo a nih pawhin ka ti lui chuang lo va. Mahse, min zêppui erawh a ngai dawn a nia,” a ti leh te te phawt a. Chutah, Bawihi, i duhawmin i hmelṭha ka ti tak zet a, ka mamawh pawh min phuhrûk dawn hlein ka hria a ni. Vawi tam tak ka ngaihtuah che a, ka hisap fo che a. Nupa nun min hmanpui ṭhin la, sum tak tak ka pe ang che a, i intundinna tur khawpin ka ṭanpui ang che,” a rawn ti ta hlawl mai.

Ka ngaihtuahna chu a bing mup a, rapthlak ka ti hle bawk; mahse, kan dinhmun ka ngaihtuah chuan duh thlang thei dinhmunah pawh kan ding chuang emaw ni ka ti vawng vawng mai. Rilru han siam dan mai ka thiam lo a.

Pu Zuala bawk chuan, “Zaninah lo ngaihtuah la, naktukah chhanna min pek ka beisei ang. I pawm theih dawn phawt chuan cheng sing nga ka pe nghal ang che a. Vawi khat kan mut dun hunah nuai khat ka pe leh ang che,” a rawn ti ta reuh a.

Ka ngaihtuahna chu a vak kual ta ruai ruai mai. Mak ka ti a, rilru mumal pawh ka pu thei meuh lo. Ka thin chu a phu dup dup mai a.

“Bawihi, i dinhmun siamsak che ka duh a, chumi piah lamah chuan ka mamawh min tihsak ve ka duh vang a ni pakhat bawk. A thlawna pe tur che ka ni bik ngawt lo va, kan mut dun a piangin sing nga i hlawh ziah ang; mahse, kan pahnih inkar chauh atan ni rawh se. Naktuk lamah i rilru min hrilh dawn nia,” tiin, mu turin room lamah min luhsan ta a.

A tukah chuan nileng deuh thawin kan inbe tam lo khawp mai. Ka rilru pawh a mumal hlei thei lo. Zan a lo thlen chuan ka thutlukna chu min zawt ta a. Ka la chhang mai thei lo. “Bawihi, zak reng reng suh! Ka hmuh khawloh vang che a ni lo, nu ṭha tak i ni tih pawh ka hria. Mahse, inpuih tawn ka duh vang a ni,” tiin, zanga note clip hnih hi a rawn phawrh a, “Ka duh dana thutlukna i siam chuan cheng nuaih khat hi ka pe nghal ang che,” a ti a. Chhan loh a va han harsa tak em! Kan mamawh bawk si.

Bawiha, ka rawn ngaihtuah veng veng che a. Ka thutlukna siam hian i dam chhungin ser a pe dawn che tih hre reng chungin, duh tlang thei lo dinhmuna aṭang hian duh ka thlan a ngai tlat si a. Min dem a nih pawhin mak ka ti hran lo ang. I tana nu ṭha leh fel nih ka tumna kawng hi a dangdai bik em a tin ni! Bawiha, ngaihdam phu lo hi min ngaidam ngai lo mah la ka dem ngai lo ang che. I nu ka nihna dinhmun thleng hian min paih bosak mah la, kei chuan ka dem hauh lo ang che. Dam chhunga Nawhchizuar Fapa i ni mai tur hi ka ngaihtuah apiang hian ka na veng veng ṭhin.

Ka thutlukna siam avang chuan cheng nuaih khat chu ka dawng ta nghal a. Sum lamah buaina nei lo an ni bawk a, Pu Zuala chuan a duh zawng tih nan chuan a ui lo khawp mai. Hetianga ka nun ka hman chhoh tak avang hian, suala inngaih bik lohna leh pawisak neih lohna chuan min hneh ta zel a.

Thla hnih a liam hnu chuan Pu Zuala chuan a ṭhian hnai pahnih bulah chuan min lo zuar chhawng leh a, ka khawvel chu her dang lam a ni ta zel a. Ka dai loh tur ka lo dai palh avang chuan ka pil thuk tulh tulh tawh mai a ni. Ka theih ang angin ka inkhawl chho ve zel a. Khawvel ka awm ve tawh loh hun pawha i nawmsakna tur ka ngaihtuah em vang a ni. Thisen cancer ka ni a, rei tak ka dam tawh dawn lo tih hre reng chungin i ngaihdam tlak loh nu ka lo ni ta a nih hi.

Bawiha, Falkland-ah inhmun ka lei a, LSC pawh i hming vek a tih a ni a, thingremah khan a document file chu a awm vek ang. Bawiha, sawi tur ka van ngah tak em! Mahse, ka chau tak zet, tunah hian ka bulah awmin ka fapa tia i chala fawha kuah vawng vawng che ka châk lutuk! Mahse, he nu tenawm tak hi i tan kuah tlak a ni tawh si lo. Bawiha, i ngaihdam tawh ngai loh tur hian ngaihdam erawh ka dil tho ang che. Min ngaidam rawh aw.

Bawiha, chuan, ka lo sawi hmaih ṭêp! I pa khan a dam lai khan insurance a lo ti hman hlauh a. Chu chu claim mai lovin, ka theih ang angin ka pek chhunzawm a. Kumin kum tawp lam hian a mature dawn a, lehkha pawimawh kengin insurance office lamah i buaipui dawn nia. Ka lehkha hnutchhiah che hi i hmuh vat ka beisei. Kei pawhin insurance ka ti a, chu pawh chu nangma’n i lo claim dawn nia. Lehkha pawimawh tur ang chu thingremah khan a awm vek ang.

Bawiha, sawi tur ka va han ngah tak em! Mahse, sawi ṭeuh nan hun ka nei si lo. Ka fapa, ka va han ngai tak che em!

Tunah chuan ka chau tawh em mai, duh tawk rih phawt ang aw. Hun ka neih chuan remchangah ka ziah chhunzawm mai dawn nia...” tiin, thisen hruk fai tumna hlimthla ni àwm tak chuan paper mawng lam chu a sen deuh nuai a.

Ka nu lehkha min hnuhchhiah ka chhiar zawh chuan ka ṭhu sawp nuaih a, ngaihtuahna mumal pawh ka nei lo. Ka thin a rim nge, ka lawm pawh ka hre thiam lo. Ngaihtuahna ka nei lo hi a ni ber mai.

Keimah vangin hetiang dinhmunah hian a ding a, han dem viau dawnin ka dem theih a niin ka hre lo va. Thil ṭha leh kawng dik erawh a ni hauh lo tih chu ka hre thiam ve reng; mahse, ka nu, ka neih chhun kha a nih miau avangin ka haw phal lo a ni ber mai. Haw mah ila, ka hauh phakah a awm tawh lo va. Kir leh tawh ngai lo turin vaivuta chhilh hnan a ni tawh.

Ka biangah chuan ka mittui chu a far thla fap fap a. Lungchhe tak chuan mahni chuahin ka ṭap ta hawm hawm a.

Khawvelah hian hlimna dik tak hi eng nge ni a, eng nge hlimna awmzia chu? Ka neih chhun ka chân a, ka neih chhun te pawh chu ka tan natna a ni leh zel si. Engati nge hetiang kawng hi ka zawh bik le? Ka lo dai dik tawk loh vang han ti dawn ila, thianghlim taka ka awm lai pawh khan hetiang boruak hi a lo inṭan daih tawh si. Ka innghahna leh ka khawvel chu tih chhiat mek a ni a, a kawng tawp thleng mai dawn te hian ka inhre rum rum mai. Ka pa ti-a koh tur te, ka nu ti-a koh tur te ka nei ve tawh lo. Unau pianpui ka nei hek lo. Hei hi ka kawng tur renga ruat a ni em ni? Zawhna tam tak ka inzawt mawlh mawlh a. Chhanna erawh ka hmu thei si lo.

Zan dar 8:30 a ni a, ṭhutthlenga mu zal mai mai pah chuan LPS pro- fight live chu ka en a. Chutia ka en lai mek chuan ka phone chu a rawn ri ral ral a. Ka’n en vat a, Puipuii a lo ni a.

“Duat, eng nge i tih a? Tunlai chu kan inbe khât lutuk a, ka ngai tawh lutuk che. I ṭha em?” a rawn ti nghal mawlh mawlh a.

“Umm, ka ṭha alawm. Kei pawhin ka ngai che,” ka’n ti liam ve ngawt a.

Dik tak chuan ka rilru tak tak chu a ni hauh lo. Ngaihtuahna mumal ka nei thei lo va, mi tumah hi ka rilruah an awm tak tak lo a ni ber. Khawhar laia ka inhnemna te, chhungkua ti-a ka sawi tur te chuan khawvel dangah min awmsan tawh a. Ka inngaihtuah a, kei leh kei ka inkhawngaih chawp a. Eng mah ka ti thei lo hi a ni ber mai.

Puipuii vek chuan, “Ka ngai tak zet che aw! Tunlai chu kan buai ve deuh ṭhin bawk sia, kei pawhin ka rawn be tam hman lo che a ni. Ka tihpalh lutuk aw,” a rawn ti leh mawlh mawlh a.

Ka chhan ve hma hauh chuan, “Duat, ihh... thil dang daih,”a rawn ti chuai raih a.

“Eng thil dang maw?” tiin ka lo chhawn vat a.

“Ihh, i phal loh chuan ka ti lui chuang lo va. Sangsangi kha i la hria em, ka ṭhiannu kha? “Umm, hria e”.

“Ihh, Shillong aṭangin a rawn chho va. A nu leh pa an inṭhen a, han pan zawk tur a hre mai lo va. Hotel-ah tlen a tum a. Mahse, pawisa a nei lo ve sia, ka khawngaih deuh a. Zanin chiah i inah khan i lo riahtir ve mai dawn em ni?”  a ti a.

“A van zia lo ve. Engati nge a nu leh pa chu an inṭhen reng reng a?”

“Ka hre bik lo, ka la zawt chiang bik lo va. Tunah Zarkawtah a awm mek a. ‘Ka lo dilsak ang che a, a rem chuan ka rawn hrilh leh ang che’ ka tia. Ka rawn bia che a nih hi,” a rawn ti leh a.

“Aaa, rem lohna chhan tur a awm hlei nem, nang berin i tih te chuan,” ka ti a.

“A number ka lo pe ang che a, i han hruai lawk mai dawn nia, taxi fare a to thei si. Chu bakah, amah chauh a ni bawk sia, ka ngaihtuah ve deuh a,” a tih zawm zat a.

“Aw le, ka han hruai dawn nia,” ka ti a.

“Ka’n hrilh lawk ang a, chuan han phone lawk ve hrim hrim rawh aw,” tiin phone chu a dah ta a.

Sangsangi chuan Zarkawt traffic point bulah chuan min lo nghak a, min hmu chu a thaw ve huai hian ka hria, a lo mangang ru ve hle a ni ang. Vawi khat kan inhmuh bak kha kan la inhmu leh lem lo va; mahse, kan inbiak ve fo avangin ka innel ve phian. Puipuii aiin a sang zawk a, a ngo zawk bawk; mahse, tlemin a cher zawk hret a. Khal pangngai ve tak chu a ni tho. A hnutebu lian lo te, pawng al mai chuan mit a la phian bawk. A sexy zawk mah mah hian ka hre ṭhin. Hnute lian hi chuan mit chu a la ngei a; mahse, lian vak lo, kawh deuh lah mar deuh pang hian ngaihtuahna hur a ko chhuak hma zawk hian ka hre deuh tlat.

In kan thlen chuan a ei tur te siamsakin, chawhmeh mumal ka lo siam loh avangin artui ka kansak nawk nawk a. Puipuii nen chuan phone-in an lo inbia a, an nui dun ar ar a.

Chutah, Sangsangai chuan, “U Zonun, kha i Bawihtei’n a be duh che,” tiin phone chu mi rawn pe a.

“Duat, a hrehawm lo ang tiraw?”

“Hrehawm lo ve,” ka ti sam et a.

“Bungrua a rawn thleng dawn a. Zanah ka rawn be hman lo che a nih chuan zingah hma deuhin ka lo bia ang che. Tunlai chu kan buai lutuk a, inenkawl ṭha rawh aw. Ka hmangaih che,” a rawn ti sap a.

“Kei paw’n ka hmangaih che alawm,” ka ti thawp ve sat a.

Sangsangi chuan kan ṭawng chu a lo hre phak chu niin, a rawn ner nawng nawng a, lei min chhuah khum vel a. Eng mah phei chu a sawi chhuak lem hlei lo va.

Puipuii bawk chuan, “Duat, duh tawk rih mai ang aw, Sangsangi kha ṭha deuh khan lo mikhual lawk mai la, naktukah chuan an chhungte bulah pawh kaltir dan a awm mai ang. Zana han tih chung chung chu hmeichhia te a lo ni bawk nen, a buaithlak em mai,” a rawn ti leh duah a.

“Aw le. Ni e, hrehawm a ti hman em lo ang chu,” tiin phone chu kan titawp ta a.

Sangsangi’n chaw a ei kham hnu chuan an chhungkaw chanchin te, a nu leh pa te inṭhen chhan te chu ka zawt mai mai a. Amah pawhin chiang takin a lo la hre bik lo va, “Mi rawn phone a, rawn haw phawt la an ti tlat a, engmah chiang takin ka hre bik lo,” a ti a. Mahse, mi harhvang tih takah a lak nat hmel lem loh. Nge ni a, hlim luih a tum hram hram zawk pawh ka hrethiam bik chiah lo. Mahse, a hrehawm duh dan tur ka ngaihtuah a, keimahah ka inchan chuan hlim luih a harsa hian ka ring.

Eng emaw chan kan titi hnu chuan inbual turin a insiam a, “Ka nu room lamah hian i mu duh mai em?” ka ti a. A ngawi deuh vang vang a, “Ṭhuttlengah ka mu mai ang,” a ti a.

“A hrehawm dawn asin”.

“Hrehawm lo ang, ka mu ṭhang alawm,” a ti a.

“Ummm, inbual phawt mai teh,” ka ti a. Inbual tur chuan a lut ta a.

Ka room-ah chuan woofer-ah ring vak lo hian Smokie ho hla, Mexican Girl ka lo ngaithla a. Chutia ka awm lai chuan Sangsangi chu a hnutebu chunga towel bih chung chuan a rawn lut a, a mal chanve vel lang tai hmuh a nuam kher mai. Mahse, bialnu te ṭhian han hmuh taih tum ngawt chu ṭha ka ti lo va. Ka ngaihsak duh lem lo na a, ka mit sir chuan ka melh leh zawk ṭhin.

Ka piah deuhah chuan a inhru mawlh mawlh a, ka hla play chu a sakpui rat rat a. Boruak a vawh tawh thu te chu a sawi pah nawk nawk bawk a. T-shirt a ha a, a hnuiah bra a hren àwm ka hre miah lo. Ngaihsak lo angin awm mah ila, ka mit sir ru reng ka tih kha. Pyjama kekawr thawl lam deuh a ha bawk.

A inthlak zawh chuan ka bulah chuan rawn ṭhu pheiin a ti ti siam siam a. “Mizoram chu boruak a vawt tawh khawp mai. A fresh bik bawk si,” a ti a.

“Nia, kan ram nge nge, a boruak hi a nuam teh a nia! Kawr lum te i duh em? I hak duh chuan...” tih pahin, ka thawmhnaw bawm lam chu ka kawk a.

“A ngai lem lo, in chhungah chuan a vawh vak loh hi. Beer lem sek tur awm sela, tui deuha muthilh bawrh bawrh a châkawm,” a rawn ti reuh a.

“Teh tlat chuan! I in ṭhin em ni?”

“In ve zeuh zeuh e, beer hi chu a tui ve reuh em alawm!”

“A lakna hnaiteah chuan ka hria asin, ka va lak dawn che em ni?” ka ti a.

“Naa, zan a rei tawh em hi, keimahin ka awm ngam lo,” a ti a.

“Irawn kal ve anga a ni mai alawm. Minute 15 tlan vel bak a ni lo,” ka ti a.

A insiam sawk sawk a. Beer chu ka va lampui a, can li kan lei a. Inah chuan titi pahin kan in dun ta a. Zu pangngai chu ka in duh tawh lo a, beer erawh hi chu pawi lo turah ka ngai a, ka in ve leh ngawt chu a nia.

Sangsangi chuan rin aiin a lo in thei daih a, can khat ka in chhungin can hnih a lo in zo hman a. “Pakhat hi chu kan inṭawm dawn nia,” ka tia, a nui seih a. “In rawh, kei chu ka duh tawk,” a ti a.

“I la kham loh hmel em kha! Kei chu ka in tam ngai hlei nem,” tiin ka pe a.

“A nih, a zatve hi ka in ang a, a bak i in ve dawn nia,” tiin a tlak nghal pap pap a. Mi rawn en a, a nui seih a. A va’n duhawm tak! A meng deuh siar siar a, “I va’n fel tak! Nang i lo awm remchang hlauh a,” tiin min fak luam a.

“Hla play leh la, lâm ang,” a ti ta reuh a.

“Naaa! Ka lâm thiam lo, ka lâm ngai lo,” ka ti a.

“A ho lutuk, thiam a ngai lo. Puipuii te nen pawh kan lâm ṭhin alawm”.

“Lâm la, ka lo en ang che,” ka ti a.

“Mahni chuah te chuan ka zak ve alawm aahh! Min lo lampui rawh,” a ti tlat a.

Tu mah an awm lo bawka tiin ka han ding ve ta hluai a, ka zam viau tho mai. A lo kai ve deuh bawk nen, ka darah rawn vuanin, “Lâm dun ang. Ka ta tur i nia, Puipuiin min neih khalh che a, kan inhmuh tirh khan ka duh daih tawh che. Mahse, kei chu Puipuii ka tluk lo va,” tiin, lungchhe tak hian a sawi kual vel ṭan a.

“Ṭhian kan ni tho alawm,” ka ti a.

“Ṭhian nih ngawt chu a tawk lo alawm. Ka ṭhiannu hi ka lawmpui lutuk; mahse, ka thik ṭhin khawp mai. Ka rui miah lo a nia aw, ka rilru tak tak a nih chu ka sawi,” a la ti ta deuh deuh.

A inngaihtuah lungpuam tak tak hmain tiin ka kuah hnai nawk a. Ka fawp ta mawlh mawlh a...

[Chhunzawm zel tur]